logo

Atletanan di judo a sali pa un campo di entrenamento na Republica Dominicana

Recientemente e atletanan di judo, Emmazira Kelly, Izaac Croes hunto cu nan coach Betto Thiel, a sali pa un campo di entrenamento na Republica Dominicana. E campo di entrenamento ta un preparacion pa cu dos torneo importante na cual ambos atleta lo competi na dje den e proximo luna esakinan na Gwangju, Korea como tambe e US Open na Fort Lauderdale, Merca. E campo di entrenamento na Republica Dominicana lo ta for di dia 16 pa 23 di juni.  

Durante di un periodo di un siman e atletanan lo haya entrenamento intensivo y riba nivel halto. Na banda di e entrenamentonan intensivo, e competencia tambe ta un aspecto importante y crucial. E atletanan lo competi den torneonan di fogeo contra scolnan di judo na Santo Domingo mes. Asina cada un por midi unda, y con, nan ta para pa e dos torneonan grandi otro luna. Mas cu claro pa e entrenando tin material pa por evalua su pupilonan durante di e competencianan. Mirando e importancia pa e progreso deportivo di nos atletanan ta importante pa aporta cu e parti financiero pa asina nos atletanan di judo por ta mas miho posibel prepara pa dicho torneonan den exterior.