logo

Atleta di landamento sincronisa, Anouk Eman kier yega e Weganan Olimpico di Rio 2016

Un di e atletanan di Aruba cu mas exito a cosecha den e ultimo añanan sin duda ta e Anouk Eman di e deporte di landamento sincronisa. Un atleta cu a logra varios premio grandi den exterior tanto den competencia universitario como competencianan unda e la representa nos dushi isla di Aruba. Mirando cu Anouk ta na Aruba pa asina prepara su mes pa e Weganan Panamericano di Toronto, Canada nos a acerca su persona pa asina no papia un poco con e la biba su exito den e deporte di landamento sincronisa y claro su yega “ultimate dream” manera e mes a yame cu ta e Weganan Olimpico di Rio cu lo tuma luga den 2016. 
Apesar di a gana e medaya di brons pa Aruba den e Weganan CAC na Veracruz, Mexico, cosnan no tabata facil pa Anouk Eman despues di esaki. Anouk a keda varios tempo sin un coach permanente y tabata entrena riba su mes. Varios ora e la pasa den piscina ta entrena su so cual sigur no ta algo facil. Esaki pa motibo cu e la gradua di Lindenwood cual ta e colegio cu e la bishita, loke a hasi cu e no por a forma parti mas di e ekipo. Hunto cu su duet partner Kyra Hoevertsz y  coach Lori Eaton a traha e coreografia pa dos rutina nobo cual tarea Anouk tabata tin pa ehecuta den e miho forma. Aunke e distancia entre su persona y Kyra ta leu, tog nan ta logra comunica cu otro pa loke ta e dos rutina nan cu lo ser landa durante di e Weganan Panamericano na Toronto. Nan ta comunica via Skype y esaki te ainda ta bayendo perfecto. 

Segun Anouk, e cu Kyra ta "sinti" otro pues cu otro palabra nan ta surpasa e hecho cu nan no por a entrena hopi tempo hunto pa logra un bon presentacion. Un ehempel grandi di esaki tabata e Weganan CAC unda apenas dos siman nan a haya e chens pa entrena hunto. Asina mes nan a logra triunfa cu un medaya. Claro cu e kier logra haci un tremendo papel durante di e Weganan Panamericano na Toronto pero mas cu tur cos Anouk y Kyra lo kier duna un bon presentacion durante di e campeonato mundial di landamento sincronisa cu ta algun siman despues. Ambos lo kier drenta entre top 20 atletanan di mundo, un posicion cu nan lo bataya duro pe. 

Pa Anouk e Weganan Olimpico ta su soño desde cu e tabata mucha jong y awo e lo kier traha duro pa yega eynan. Pesey mes e hunto cu Kyra lo ta un tempo largo hunto unda nan lo entrena pa yega e meta poni nan dilanti. Segun Anouk, ora e mira e gana cu Kyra tini, e tambe ta sinti cu mas esfuerso mester ser haci pa yega unda nan kier yega. 

Den luna di maart di 2016 nan ta participa na e campeonato clasificatorio y asina por cualifica pa e Weganan Olimpico di Rio 2016. Si esaki bira realidad e lo ta e “ultimate dream” pa Anouk. Su dak den deporte e la yega paso esey ta loke for di mucha e la trahe y soña pe. Segun Anouk ta hopi disciplina y sacrificio esaki a trece cune, na e mesun momento tambe hopi ups and downs, pero tur cos pa un solo meta. 
Na final Anouk mes a bisa cu semper bo mester esforsa mas hopi cu bo por, aunke cu bo ta sinti cu bo no por mas, paso a lo largo ora bo caba, e satisfaccion ta grandi. Entrenando tur dia den e forma aki bo lo yega leu den loke bo ta haci sigur den deporte.