logo

Atleta di BMX, Zaithyel Soekandar a logra un marca un bon tempo den e careda contra holoshi

Diabierna merdia, e hoben coredo di BMX,  Zaithyel Soekandar mester a bini den accion den e Weganan Panamericano na Toronto, Canada ora el a competi den e asina yama careda contra holoshi den e deporte di ciclismo, disciplina BMX. E hoben Zaithyel Soekandar a competi contra di un elenco profesional di henter e continente America. Como un di e mas hobennan entre e 24 coredonan elite, e hoben Soekandar tabata determina pa haci un bon papel den e careda contra holoshi. Guia pa su coach Pedro Estaba, e atleta Zaithyel a cuminsa su careda den tremendo forma unda e la core riba un pista dificil cu seronan halto.

Den e prome ronda den e careda contra holoshi, Zaithyel Soekandar ta marca un tempo di 38.590 seconde riba e pista di Centennial Park, cu e tempo registra Zaithyel a termina na di 14 luga den 24 coredo. E hoben Soekandar tabata contento cu su tempo marca aunke e tabata por miho. Asina mes e la sigui pa e Super Final di e time trial unda e miho 16 di e 24 coredonan ta sigui, pero aki Zaithyel Soekandar ta sufri un accidente chikito y no ta finalisa e time trial. Ta bon pa menciona cu e time trial di diabierna a defeni e posicion di salida di Zaithyel Soekander pa e careda di diasabra.