logo

Atleta clasifica pa e Weganan Olimpico Rio 2016: Thijs Visser(Nacra 17)

Durante e fechanan 5 – 21 di augustus proximo, e evento deportivo mas grandi di universo lo tuma luga na Rio de Janeiro, Brazil. E di 31 edicion di e Weganan Olimpico lo conta cu un participacion di 10.500 atleta for di e 206 paisnan miembro di Comite Olimpico Internacional. Pa prome biaha den historia di e deporte Arubano, e delegacion di Aruba lo competi cu te cu awor 6 atleta clasifica. E atletanan aki cada uno ta preparando pa participa na dicho weganan. Un di e atletanan aki ta Thijs Visser den e deporte di Bela disciplina Nacra 17. Esaki ta un bon momento pa nos comunidad y mundo henter sera conoci cu e atleta aki cu lo representa nos dushi isla na e Weganan di Rio 2016. Nos a combersa cu Thijs unda nos a puntra con e la cuminsa cu e deporte di bela, ken tur a motiva su persona, kiko ta su logronan, mensahe di su persona na nos hoben deportistanan na Aruba, ect.

 

E atleta Thijs Visser di origen Hulandes a nace na Hulanda. E la crece como mucha riba un catamaran y tabata drumi den manera mes ta bisa “zeilkist”. Na un edad hopi hoben e tabata adicto na nabega riba catamaran. Pa mas cu 10 aña Thijs a nabega cu su tata y despues di esaki a bira un profesional den e deporte unda ela cuminsa competi den e klase F18 hunto Coen de Koning. Aki ambos a logra dos titulo mundial y a gana numeroso titulonan entre 2008 y 2012. Despues di 2013,Thijs a forma duo den e clase Olimpico Nacra 17 hunto cu e tempo aya su partner Mandy Mulder. Hunto nan a logra hopi exito, entre otro e campeonato mundial mientras nan tabata posiciona como e number uno riba e ranking mundial. Na september 2013, Thijs a dicidi di haci un cambio y kier a competi pa Aruba hunto  cu su actual partner Nicole van der Velden. Un campaña cu a bay cu hopi reto, cu sigur no tabata facil, pero asina mes tabata tin exito unda na 2015 a logra un di shete luga den e campeonato mundial di Nacra 17 na Aarhus, Dinamarca cual a duna nan e clasificacion pa e Weganan Olimlico di Rio 2016.

Thijs semper lo kier sigui crece mei mei di e miho atletanan di bela na mundo y claro pa e tambe bira mescos cu nan. Na banda di esaki bela ta un competencia cu elementonan di naturalesa y e ta spectacular pa enfrenta e factornan aki den su momentonan mas fuerte. Hunto  cu Nicole e lo traha pa riba un perfeccion y un stabilidad mental como ekipo y presta riba e momento oportuno. Pa Thijs e logronan di mas importante tabata e titulo mundial den F18 na 2009 unda e la bira e campeon di mas hoben den e disciplina aki. Tambe y titulo mundial logra na Palma na 2013.

E deporte di bela ta den su miho momento y Aruba por probecha bon di esaki pa encurasha otro hobennan pa cuminsa practica e deporte y ya nos ta mira esaki caba na diferente ocasion. Door di introduci na e hobennan e deporte di bela, por haya e oportunidad di organisa campeonatonan internacional y kizas por busca algun bon entrenador pa yuda e deporte mas aun. Door di esakinan por dal un stap na un nivel mas halto. Pa Thijs semper e ta un honor pa por a haya e chens di representa Aruba, pero mas grandi ainda ta logra un medaya Olimpico pa Aruba cual ta soño di cualkier atleta. Tur cos den bida ta posibel, percura pa bo tin un meta, traha duro y busca e miho hendenan pa apoya y sostene bo.