logo

Atleta clasifica pa e Weganan Olimpico RIO 2016: Philipine van Aanholt

 Durante e fechanan 5 – 21 di augustus proximo, e evento deportivo mas grandi di universo lo tuma luga na Rio de Janeiro, Brazil. E di 31 edicion di e Weganan Olimpico lo conta cu un participacion di 10.500 atleta for di e 206 paisnan miembro di Comite Olimpico Internacional. Pa prome biaha den historia di e deporte Arubano, e delegacion di Aruba lo competi cu te cu awor 6 atleta clasifica. E atletanan aki cada uno ta preparando pa participa na dicho weganan. Un di e atletanan aki ta Philipine van Aanholt den e deporte di bela, disciplina Laser Radial. Esaki ta un bon momento pa nos comunidad y mundo henter sera conoci cu e atleta aki cu lo representa nos dushi isla na e Weganan di Rio 2016. Nos a combersa cu Philipine unda nos a puntra con e la cuminsa cu e deporte di bela, ken tur a motiva su persona, kiko ta su logronan, mensahe di su persona na nos hoben deportistanan na Aruba, ect.

 

E atleta Philipine van Aanholt a crece riba e isla di Corsow. Eynan riba e awanan di Spaanse Water e la siña nabega. Prome su tata tabata hibe den e Sunfish of den e Yngling, pero na cinco aña di edad e mes a cuminsa su so sin mucho ayudo. Philipine su prome competencia internacional tabata den e Scotia Bank Regatta na St. Thomas. Eynan e la ripara cuanto mucha den Caribe ta no solamente practica bela pero tambe participa na e diferente competencianan. Esaki a habri su wowonan. Su mayornan a lanta Youth Sailing Curacao y eynan e la siña nabega na nivel competitivo.

 

Philipine van Aanholt su trayectoria den e deporte di bela ta simplemente inmenso. Despues di a atende varios clinica di bela, Philipine a competi den tres North American Championships y dos biaha den e campeonato mundial Optimist. Despues di Optimist e la cambia pa Splash, cu tabata un boto di un persona. Na 2008, Philipine a bira campeon mundial na Portugal den e categoria femenino mientras na 2009 e la termina na un di dos luga. Na 2009 tambe, Philipine a bira campeon mundial den Sunfish na Bahamas. Na 2008, e la participa pa  prome biaha den e ISAF Youth Worlds den e disciplina di Laser Radial. Esey sigur tabata un experiencia unico, su tata Cor van Aanholt a competi den e Weganan Olimpico di Sydney, Australia na aña 2000 den e disciplina di Laser Radial. Na 2009 y 2010, Philipine a competi den e ISAF Youth Worlds den Laser Radial. Na e campeonato aki mescos den e Weganan Olimpico ta un representante so pa pais mag participa. Na januari 2010, Philipine a cambia pa Laser. Su prome bon resultado tabata un di tres luga den e campeonato di Hulanda y un di cuater luga den e Weganan Centro Americano y del Caribe.

 

Den e periodo di verano 2010, Philipine a continua cu su estudio na Groningen, Hulanda y aki pa un aña largo e no a competi. Pero na 2011, e la dicidi di para un periodo cu su estudio pa asina purba di clasifica pa e Weganan Olimpico di Londres. Na caminda pa Londres, Philipine a logra hasi un bon papel, logrando un di cinco luga den e Weganan Panamericano na Guadalajara, Mexico, un di 14 luga den e campeonato mundial na Melbourne, Australia, y un tercer luga den e campeonato mundial categoría U-21 na Alemania. Naturalmente pa Philipine un di e logronan excepcional ta e clasificacion cu ela logra pa e Weganan Olimpico di Londres 2012. Despues di su clasificacion a bira obvio cu e no por a competi mas bou di e bandera di  Antiyas Hulandes, mirando cu e país Antiyas a stop di existi. Hunto cu dos otro atleta di Corsow nan a competi bou di e bandera Olimpico como Atletanan Independiente (IOA), loke riba su mes ta algo histórico pa e atletanan aki, entre nan Philipine van Aanholt.

 

Despues di Londres, Philipine kier a concentra su mes completamente pa Rio 2016, pero su mayornan a consehe pa e caba su estudio prome, loke ela haci tambe. Pa dos aña largo e la continua cu su estudio na Groningen unda e la obtene su diploma den Bedrijfskunde. Ora e la termina Philipine kier a sigui cu su deporte pero mirando cu Corsow no tin un statuto Olimpico y Antiyas di seis no tabata existi mas tur cos a mustra envano te ora cu Comité Olimpico Arubano (den consulta cu Comité Olimpico Internacional) a dicidi di ricibi su persona, dunando Philipine e oportunidad unico pa e sigui cu su soño. Den su prome competencia oficial pa Aruba, Philipine a logra medaya di Oro den e Weganan CAC na Veracruz, Mexico y den e Weganan Panamericano na Toronto e la logra un di cuater luga y su clasificacion pa e Weganan Olimpico di Rio 2016. 

 

Momentonan memorabel pa Philipine sin duda tabata e Ceremonia di Apertura di e Weganan Olimpico di Londres 2012, e adrenalina tabata grandi na e momento cu bo drenta e stadion, un experiencia dificil pa discribi. Pa Philipine semper e ta un momento unico pa ta un di e miho atletanan pa representa su pais mei mei di tur e grandinan den deporte, un berdadero honor. E preparacion pa e weganan y e campaña Olimpico ta mesun importante cu e weganan mes. No mester lubida cu e Weganan Olimpico tin un duracion di tres siman, pero carga e titulo di un atleta Olimpico ta pa semper.