logo

Atleta clasifica pa e Weganan Olimpico RIO 2016: Mikel Schreuders(Landamento)

Durante e fechanan 5 – 21 di augustus proximo, e evento deportivo mas grandi di universo lo tuma luga na Rio de Janeiro, Brazil. E di 31 edicion di e Weganan Olimpico lo conta cu un participacion di 10.500 atleta for di e 206 paisnan miembro di Comite Olimpico Internacional. Pa prome biaha den historia di e deporte Arubano, e delegacion di Aruba lo competi cu te cu awor 6 atleta clasifica. E atletanan aki cada uno ta preparando pa participa na dicho weganan. Un di e atletanan aki ta Mikel Schreuders  den e deporte di Landamento cu a logra su clasificacion den e 100m estilo liber. Esaki ta un bon momento pa nos comunidad y mundo henter sera conoci cu e atleta aki cu lo representa nos dushi isla na e Weganan di RIO 2016. Nos a combersa cu Mikel unda nos a puntra con e la cuminsa cu e deporte di landamento, ken tur a motiva su persona, kiko ta su logronan, mensahe di su persona na nos hoben deportistanan na Aruba, ect.

 

Cu e edad di 8 aña, Mikel su kerida mama a puntra e y su ruman, Anahi si nan tabata kier a bay les di landamento den lama of den piscina. E tempo ey Mikel y su famia tabata biba na Boneiro y aki Mikel tabata practica e deporte di windsurf. Door di ta tur dia den laman, Mikel a dicidi di lo kier haya les di landamento den piscina. Mikel ainda ta recorda su prome lesnan di landamento, unda e la wordo pone prome cu e muchanan chikito y despues di un les ya caba e tabata den e grandinan. Na comienso Mikel nunca a tuma e deporte di landamento na serio asina mes cu e tabata landa hopi. Pero despues di a haya e motivacion di su mayornnan como tambe e influencia di coach Ismael Santiesteban, tur cos a cambia desde e momentonan ey y landamento a bira parti di Mikel. Su mayornan tur dia ta transporta Mikel pa piscina y gym, esaki mainta tempran y atardi. Su coach ta esun cu a wak e talento den dje y pushe pa e bay padilanti.  Pa Mikel e sacrificio y entrenamento duro di su persona, e ayudo su mayornan y e guia di su coach a pone logra su metanan. Pa Mikel su miho logronan tabata na Chile den e Campeonato Sur Americano Hubenil. Aki e la gana su prome medaya di Oro pa Aruba den 200 schoolslag. Y mas cu claro e clasificacion pa e Weganan Olimpico cu un tempo B na Republica Dominicana. E parti mas cu e ta corda tabata na Dubai den e Junior World Championship, un experiencia inolvidabel. Por ultimo Mikel ta haya cu e ta un honor pa ta un atleta cu a clasifica pa e Weganan Olimpico pa Aruba, e ta algo hopi grandi. E ta un soño di tur atleta pa yega na “The Olympics”. Su mensahe; “Si bo kier logra lo maximo, pone tur bo esfuerzo den dje y tur cos ta bay ta bon. Hasta nos na Aruba riba un isla chikito por haci loke tur otro tambe por haci. Semper ta bay tin momentonan bon y menos bon den bo carera pero semper keda positivo”.