logo

Atleta clasifica pa e Weganan Olimpico RIO 2016: Jayme Mata(Judo)

Durante e fechanan 5 – 21 di augustus proximo, e evento deportivo mas grandi di universo lo tuma luga na Rio de Janeiro, Brazil. E di 31 edicion di e Weganan Olimpico lo conta cu un participacion di 10.500 atleta for di e 206 paisnan miembro di Comite Olimpico Internacional. Pa prome biaha den historia di e deporte Arubano, e delegacion di Aruba lo competi cu te cu awor 7 atleta clasifica. E atletanan aki cada uno a gana e derecho pa medio di clasificacion pa participa na dicho weganan. Un di e atletanan aki ta Jayme Mata den e deporte di Judo cu a logra su clasificacion via un sistema di punto. Esaki ta un bon momento pa nos comunidad y mundo henter sera conoci cu e atleta aki cu lo representa nos dushi isla na e Weganan di RIO 2016. Nos a combersa cu Jayme unda nos a puntra con e la cuminsa cu e deporte di Judo, ken tur a motiva su persona, kiko ta su logronan, mensahe di su persona na nos hoben deportistanan na Aruba, ect.

 

Como hoben Jayme no a focus riba un deporte specifico e la haci diferente  y tambe Judo(Ne-waza cu ta judo riba vloer). Despues Jayme a ripara con importante esaki ta paso awo tur investigacion ta mustra cu talentonan mester ta “breedmotorischopgeleid”. Na 1999, Jayme su focus a bay completamente riba judo y nunca mas e la stop di praktica esaki.

 

E la scoge pa e deporte paso esaki tabata yamativo  y su amistadnan manera Javier Wanga, Fiderd Vis y e rumannan Guido y Vito Carlo tambe tabata praktica judo. E comunidad di judo ta uno habri y bunita sea local of internacional. Loke Jayme gusta di judo ta cu e ta un deporte hopi disciplina y specialmente e judo competitivo ta fisicamente duro y tambe cu hopi exigencia  mental. Strategia y tactica ta un hunga un rol importante den judo competitivo. E reto fisico den tur entrenamento ta loke Jayme gusta, ora bo no por mas bo tin cu lanta y sigui padilanti.

Su motivacion pa loke e ta haci a cuminsa na cas. Semper Jayme a conta cu apoyo di su mayornan y henter famia den locual e ta haci. Manera e ta bisa: “Pami tata tur cos cumi haci mester tabata 100%”. No tur ora e tabata bay, pero un dia bo lo yega unda bo kier yega. Esey ta loke Jayme a haci den su deporte, estudio y trabou. Danki na e mentalidad aki e por competi den un Wega Olimpico. Actualmente Jayme tin dos estudio na nivel di “master” y un bon trabou na Hulanda unda e ta residencia.  

Na Hulanda, Jayme ta entrena cu su coach Gerrie Theunissen cu ta guia tur entrenamento y competencianan na nivel local. Pa loke ta e parti fisico Jayme tin un entrenador personal cu ta un ex-top judoka di Hulanda, Jeffrey Meeuwsen. Pa e parti di fisioterapia y revalidacion, Jayme ta haya guia di Danny Meeuwsen kende na Weganan Olimpico di London 2012 a forma parti di e seleccion Hulandes. Na Aruba, Jayme ta entrena cu tanto Fiderd Vis, Betto Thiel y Alexis, tur tres a yude su persona enormemente den e deporte di judo.  Aruba Judo Bond a duna tur colaboracion pa por a haya e sosen di IJF pa asina e yega na e torneonan necesario. Sin lubida Cemedar Sports Medicine cu semper a habri porta pa duna Jayme un man.  

E trajecto pa yega na e puntonan aki tabata uno largo y hopi duro. E sistema cualificatorio pa Judo ta uno largo cu a cuminsa 2 aña prome cu e Weganan Olimpico. Den e caso aki e la cuminsa den luna di Mei 2014 y finalisa Mei 2016. Pero pa Jayme e trajectoria a inicia prome cu esey. Despues di a competi na London 2012, Jayme a bisa cu e lo kier bay un Ciclo Olimpico mas, pero e biaha aki como atleta clasifica y no via invitacion. Pa cu e Weganan Olimpico na London, Jayme a traha hopi duro pa por a competi den e miho forma posibel. E clasificacion pa yega Rio tabata importante, apasar di e comentarionan ricibi riba su edad halto pa un ciclo mas cu no a conta cu mucho sosten na comienso no a stroba su persona di mira con e lo yega Rio como atleta clasifica via e sistema clasficacion. Aki un plan a wordo trah pa asina Jayme logra su meta poni. E trajectoria no a bay facil, tur cos tabata un reto, un lesion tambe a haci cu Jayme pa un tempo largo no por a entrena cien porciento, pero a keda mantene e plan sin desvia di esaki. Na final di e trajecto, Jayme a logra e puntonan nesecario unda e la logra finalisa na un di dos luga den e clasificatorio Pan-Americano.

E logro di mas grandi pa Jayme  ta e clasificacion pa e Weganan Olimpico di Rio. Banda di esey tabata na 2005, un di shete luga den e  Pan Americano di Judo na Puerto Rico. Jayme su momento mas memorabel tabata e Weganan Olimpico di London 2012, esaki for di e prome dia te na e ultimo dia.

Segun Jayme pa e deporte di Judo drecha na Aruba varios cos mester pasa. Aruba ta hopi chikito, tin mucho tiki competencia y falta experiencia riba e nivel mas halto di deporte. E lo  conseha tur atleta pa na un edad hoben caba busca experiencia internacional. Na Hulanda tin competencia tur fin di siman, mientras Aruba tin tres competencia pa aña,  esey so caba ta un experiencia di competencia cu nunca mas nos como atleta Arubiano no ta nivela. Kizas nos por recompensa den otro forma pero a lo largo e ta keda algo masha dificil pa recobra tur esaki. Esaki no ta conta pa judo so e ta conta pa hopi deporte na Aruba. Atletanan di Aruba ta competi mucho poco y cada bez ta midi nos mes contra e mesun contrincantenan. Cu tempo bo no a siña nada nobo y ora enfrenta paisnan grandi esaki lo bira dificil, semper nos lo ta den desventaha. Den carera di tur atleta ta yega un momento cu bo tin cu tuma e siguiente paso.

Pa Jayme yega e Weganan Olimpico di Rio 2016 ta logro masha grandi mes, e ta algo sin duda hopi duro pa yega na dje. E trajecto di judo tabata uno asina largo cu na dado momento bo no tin gana mas den e biahamento, tur e lesionnan of casonan “político” di e trajectoria, pero esaki ta e momentonan cu bo mester wanta duro y haya bo mes bek y sigui riba e ruta corecto. Pa Jayme e combinacion di trabou y deporte no tabata nada facil, mester a pone prioridad. Na final loke e la pone un banda tabata parti di su bida priva/social pa por mantene su calidad na trabou y den e deporte. E ta contento cu e inversion y sacrificio toch a duna e resulta desea den su clasificacion. Awor e ta trahando duro pa duna un bon presentacion na e Weganan Olimpico di Rio 2016.

Jayme su mensahe ta pa educa bo mes riba e trajecto cubo tin cu cana, tur hende por duna bo conseho pero semper percura pabo mes bo tin un vision unda bo kier yega y traha bo plan caminda cu bo kier yega. Traha un plan y mantene un disciplina y cu tempo bo lo yega. Percura pa bo plan tin momentonan di evaluacion pa asina bo sa si tin progreso den loke bo ta haci. Cada biaha wak si bo a yega bo meta of wak kiko mester haci si acaso esaki no a cuadra den loke bo kier a yega, kizas mester a adapta cierto cosnan den bo plan pa  asina toch bo logra yega e meta poni. E forma no ta solamente ta aplicabel den deporte pero den estudio y trabou tambe. Mane nan ta bisa: “Plan, Do, Check and Act”.