logo

Atleta clasifica pa e Weganan Olimpico RIO 2016: Allyson Ponson

Durante e fechanan 5 – 21 di augustus proximo, e evento deportivo mas grandi di universo lo tuma luga na Rio de Janeiro, Brazil. E di 31 edicion di e Weganan Olimpico lo conta cu un participacion di 10.500 atleta for di e 206 paisnan miembro di Comite Olimpico Internacional. Pa prome biaha den historia di e deporte Arubano, e delegacion di Aruba lo competi cu te cu awor 6 atleta clasifica. E atletanan aki cada uno a gana e derecho pa medio di clasificacion pa participa na dicho weganan. Un di e atletanan aki ta Allyson Ponson den e deporte di Landamento cu a logra su clasificacion den e 50m estilo liber. Esaki ta un bon momento pa nos comunidad y mundo henter sera conoci cu e atleta aki cu lo representa nos dushi isla na e Weganan di RIO 2016. Nos a combersa cu Allyson unda nos a puntra con e la cuminsa cu e deporte di landamento, ken tur a motiva su persona, kiko ta su logronan, mensahe di su persona na nos hoben deportistanan na Aruba, ect.

 

E atleta Allyson Ponson a nace 4 december 1995 y tin 20 aña di edad. Su motivacion pa e deporte di landamento a cuminsa cu su rumannan mas grandi cu a drenta landamento competitivo y Allyson tabata gusta wak nan. Hunto cu su ruman morocho Gabrielle (“Gaby”), Allyson tabata praktica ballet y esaki no a bay na nan gusto, asina Ally su kerida mama a hinka ambos den landamento competitivo. Pa Allyson sin duda su kerida mama tabata su motivacion pa e logra un carera deportivo den landamento, tin momentonan cu bo djies no ta competi mesun bon mientras bo ta entrena duro y den e momento nan ey su mama semper a keda motiva Allyson pa e sigui padilanti apesar di tur contratempo y keda focus riba su metanan poni. Pa su logro di clasificacion pa e Wegannan Olimpico di Rio, Ally a tuma un aña di “break” di su estudio pa asina e concentra completamente riba su deporte preferi y mas cu claro e clasificacion. E por a duna mas cu cien porciento den tur sentido y segun Allyson esaki sigur a duna su fruto mirando cu e la entrena hopi duro mes tanto den awa como den gym.

Pa Allyson e landamento di Aruba por progresa mucho mas, e piscina Olimpico ta bon pero falta e facilidad di un bon gym den e acomodacion mes, mientras lo desea un tiki mas sosten den e departamento medico. Durante competencianan grandi, otro paisnan tin un ekipo medico full ekipa, esaki lo yuda den mehora e prestacion. Como un atleta cu a clasifica Allyson ta sintie orguyoso, e la sacrifica hopi pa su deporte, awo cu e la logra tur esaki tabata bale la pena. E mensahe mas importante di Allyson pa nos hubentud: “Praktica cualkier deporte of cualkier actividad cu ta yuda abo den bo educacion y desaroyo, haci esaki cu disciplina y pasion”.