logo

Arubaanse Voetbalbond ta introduci programa di informacion y motivacion pa engradece futbol femenino

Riba iniciativa di su president Richard Dijkhoff, Arubaanse Voetbalbond (AVB) a lansa un campaña di motivacion pa logra engrandece e rol cu e ser femenino ta hunga den e deporte di futbol na Aruba. Den CONCACAF y FIFA e proceso di envolve mas hende muhe den e deporte, tanto den e boardnan di e federacionnan como riba veld, sea como hungado of oficial.

 

E prome paso ta pa cuminsa drenta scolnan cu e mensahe di motivacion, unda cu lo presenta entre otro e storia y experiencia di Sonia Bien-Ame, kende tabata antes un futbolista y actualmente tin e funcion prestigioso di representante di Caribe den e comite ehecutivo di FIFA. Ademas, FIFA mundialmente tambe ta pidiendo e federacionnan pa percura pa 30% di nan liderazgo ta consisti di hende muhe.

 

E campaña di conscientisacion ta dirigi particularmente na e grupo di hoben di 6 pa 12 aña y lo encurasha nan pa uni na un team organisa cu ta ofrece training, weganan y torneonan.

 

Richard Dijkhoff pa hopi tempo caba tabata desea di tin mas envolvimento di hende muhe den e deporte aki na Aruba. E ta un proyecto cu AVB tin basta tempo trahando riba dje. Dijkhof a expresa cu e ta admira e ser femenino pa nan esfuerso y logronan, pa tur e obstaculonan cu nan ta vence y nan triunfonan den areanan cu ta wordo considera tradicionalmente terenonan cu hende homber ta domina.

 

E president ta mira un bon futuro den futbol femenino na Aruba. El a siña conoce diferente hende muhe tambe den posicionnan halto na diferente congreso di FIFA, y ta confia cu tambe por fin un futuro grandi den liderazgo den futbol internacional pa un of mas hende muhe Arubano.

 

E idea no ta simplemente cuminsa y finalisa na practica e deporte, pero ta bay mas leu, unda cu e deporte na su turno ta brinda oportunidadnan pa desaroyo den e bida personal pa e hende muhe, manera ta e experiencia di Sonia Bien-Ame, el a splica. E ta conta pa tur hende cu kier logra algo grandi den nan bida, el a agrega.

 

E dirigente di AVB ta satisfecho pa experiencia mas envolvimento di hende muhe den AVB tambe, como cu e ta di opinion cu nan ta trece un otro perspectiva di cosnan na mesa y cu e hende muhe y e hende homber trahando hunto pa deporte ta complementa otro pa yuda e deporte progresa.

 

Richard Dijkhoff a expresa cu e ta super orguyoso y satisfecho cu e compromiso di e stakeholder y partnernan cu ta sostene e proyecto aki.

 

Minister Michelle Hooyboer-Winklaar di enseñansa tabata presente durante di e presentacion na prensa di e proyecto di AVB, y a expresa su satisfaccion pa cu e proyecto, categorisando e ocasion como “un anuncio hopi importante”.

 

 

 

 

E mandatario a comenta cu ta importante pa reconoce e rol di deporte organisa y structura den su relacion cu e nivel di prestacion na scol. Mester considera no solamente e rol cu deporte organisa ta hunga den e mucha su bida pa cu su salud y condicion fisico, pero tambe ta deporte tin un influencia positivo riba e prestacion academico. Tin un conexion; muchanan cu ta participa na deportenan organisa ta bay bon na scol, el a agrega.

 

E proyecto aki ta rekeri, banda di e sosten di e hende muhe den comunidad, tambe e sosten di e hende homber. Hunto mester carga deporte, mester carga e iniciativa aki, y no “label” e deporte pa hende muhe of hende homber, pero pa hende homber y hende muhe, el a expresa.

 

Segregacion no mester existi, pero envolvimento y asina e proyecto ta resulta positivo pa tur dos genero; “nos como comunidad mester par atras di dje, pa yuda forma e lidernan di mañan,” Minister Hooyboer-Winklaar a bisa.

 

Mester kita e pensamento cu mucha muhe no por loke mucha homber por, y e balor agrega di proyectonan manera esun di AVB ta cu ta yuda crea lidernan femenino, y ta elimina e nocion cu hende muhe no por loke hende homber si por.