logo

Aruba Table Tennis Association lo organisa Copa Betico Croes 2016

Diamars 19 di januari benidero, Aruba Table Tennis Association ta organisa e Copa Betico Croes 2016 den Centro Deportivo Betico Croes. Pa 8or di anochi e torneo ta inicia cu tur e mesanan yen di atletanan di Masters 40+. Pa su siguiente siman esta 26 di januari, lo wordo hunga den e categorianan di infantil y hubenil esta U10, U14, U18 esaki pa 5or di atardi, mientras pa 7or di anochi lo sigui cu e categoria di B-klas y Open. E entrega di premio lo sigui despues di e final di e torneo. Den su tempo, sr. Betico Croes den felis memoria a practica e deporte di tennis di mesa, hasta den su temporada como studiante na Hulanda. Un bes bek na Aruba, Betico Croes a continua cu e deporte di tennis di mesa na Club Estrella.

E deporte di tennis di mesa a conoce un gran temporada 2015 unda a hunga varios torneo local como tambe internacional. Den e torneo Dutch Caribbean Championship, nos atletanan di tennis di mesa a sa na triunfa logrando tur e prome puestonan disponibel, un muestra cu e atletanan y e deporte ta bayendo den bon direccion. Mas cu claro esaki ta danki na e bon trabou di e federacion, e staf tecnico, e mayornan y e atletanan cu ta traha cu dedicacion na bienestar di nan deporte.