logo

Aruba ta pais anfitrion di e torneo Sur Americano Hubenil 2016 den e deporte di bowling. photo by 297 sports

Dialuna cu a pasa a inicia un campeonato internacional di bowling na Aruba cu  14 pais invita. E torneo Sur Americano Hubenil 2016 den e deporte di bowling ta uno di nivel halto unda e miho atletanan hubenil di bowling di henter e continente Sur Americano ta participa.

Paisnan presente ta Argentina, Brasil, Bolivia, Chile, Colombia, Peru, Uruguay, Venezuela sin lubida nos propio atletanan di Aruba. Na banda di e paisnan aki a invita tambe Guatemala y Republica Dominicana. E torneo a inica dialuna y lo termina diabierna awo 8 di juli y mas cu claro cu Eagle Bowling Palace ta e cas di e torneo internacional aki. Mester bisa cu nos bolicheronan a prepara nan mes den bon forma pa e torneo aki unda ta spera bon bataya y di nivel halto.

E representacion di Aruba ta den e siguiente forma. Den U16 masculino nos tin Jared Felipa y Edguard Suarez, mientras den U16 femenino nos tin Bianca Suarez y Rania Halabi. Pa loke ta e categoria U21 femenino nos tin Abigail Dammers, Shakaina Guerero, Jeadine Luidens y Shaydee Kock, mientras den U21 masculino nos tin Yannick Roos, Elias Halabi, Renald Thiel y John Elias Thiel.

Ta bon pa bisa aserca cu den e ultimo anjanan Aruba su representacion di bowling den exterior a bira uno respeta unda cu den varios torneo internacional nos atletanan a sa na logra gana torneonan renombra esaki den tur categoria. Es mas e prestacion y logronan di entre otro Thashaina Seraus y Kamilah Dammers a pone e bista riba Aruba den e deporte di bowling bira mucho mas grandi y conoci.

Un danki sigur na Lotto, e Loteria di Aruba pa medio di Comision di Subsidio cu a subsidia e torneo Sur Americano Hubenil 2016 den e deporte di bowling.