logo

Aruba lo ta presente den e campeonato World Junior Tennis Competition na El Salvador

 E dianan 11 pa 16 di maart lo tuma luga na El Salvador e Junior Tennis Competition cu ta cay bou auspicio di COTECC y ITF. E federacion Arubano di tennis, A.L.T.B tambe lo manda un delegacion di Aruba, e biaha aki un seleccion femenino. Aruba lo wordo representa pa Kayla Solagnier, Jelsyvette Croes y Danna Nunez. E seleccion lo wordo acompaña pa entrenador Jonathan Goitia. Aña pasa e seleccion femenino a haci su debut den e competencia di WJTC mientras e aña aki lo midi forza un bes mas contra e mihonan di e region di America Central y Caribe. Den 2015 e deporte di tennis a conoce un tremendo aña unda a logra gana e torneo di Davis Cup Junior na El Salvador den e categoria masculino hubenil. Tambe nos muchanan a haci un super bon papel den e Wold Junior Tennis Competition na Republica Dominicana. Por ultimo den e Junior Davis Cup na Merca, Aruba a enfenta e mihonan di Merca, Canada y Mexico, aki tambe nos hungadonan a sa na gana e respet y admiracion di nan contrincantenan.