logo

Aruba Judo Bond lo organisa diferente actividad di judo cu e conocido judoka Hulandes, Denny Meeuwsen

Diaranson atardi durante di un conferencia di prensa, e federacion di judo, AJB a anuncia un serie di actividad e dianan binidero cu e conocido judoka Hulandes, Denny Meeuwsen. E actividadnan ta en conexion cu e celebracion di e di 5 aniversario di World Judo Day. E biaha aki e tema di e celebracion lo ta "Unity". Rond mundo tin mas cu 20 miyon persona ta practica e deporte mientras 195 federacion nacional ta miembro di e federacion mundial di judo, IJF. C

 

Cu e meta pa haya mas hende practica judo y na mesun momento yuda otro mehora e calidad di bida atrabes di e poder di judo, Aruba Judo Bond a trece un experto di Hulanda. Henter un programa di tres dia a wordo traha di diahuebs te cu diasabra. E intencion ta cu e judoka Meeuwsen lo duna diferente presentacion, instruccion y demostracion riba nos isla. E lo bishita dos scol basico cu ta Graf von Zinzendorf na San Nicolas y Mon Plaisir School na Playa. Tambe nos atletanan den e categorianan cadet, junior y e mas chikitonan lo haya un  entrenamento special prepara pa nan, sin lubida nos coachnan di judo cu lo wordo involucra den tur e entrenamentonan aki. Pa nan tambe sigur e lo bira un proceso di amplia nan conocemento riba e materia aki.  

 

E vice presidente di Aruba Judo Bond, Sra. Maruska Croes como tambe entrenador di judo Fiderd Vis ta masha contento cu e presencia di Denny Meeuwsen na Aruba, su aporte sigur lo ta un beneficio pa nos alumnonan di scol, e atletanan di judo como tambe nos coachnan, dirigentenan, mayornan y e federacion di AJB. Lotto, e loteria di Aruba ta masha contento di por contribui na e bienestar y progreso di nos federacionnan deportivo cu ta traha pa e desaroyo di nos atleta y coachnan.