logo

Aruba Bodyboarding Association a organisa nan ultimo competencia pa 2015 cu e "Dos Playa Showdown"

Ultimo weekend di 2015 a tuma lugar e campeonato annual di Aruba Bodyboard Association esta e “Dos Playa Showdown 2015”. Mester bisa cu e participacion tabata tremendo unda cu e olanan tabata basta grandi entre 2 cu 3 meter di haltura. E demas competidornan a duna un show di kita sombre na e publico presente. Notabel ta cu e ultimo evento di 2015, e federacion di ABA a sera nan ranking di 2015 den Open Division. E resultado final ta como lo siguiente na prome luga a termina Jeff Meijer, sigui na unda di dos luga pa Jeremy Loefstok, na di tres luga a keda Anthony Wever, mientras na di cuater luga a keda Marvin Kock. E federacion di bodyboard tabata tin un anja 2015 hopi activo cu varios competencia local pero tambe e competi riba nivel internacional. Den luna di oktober  algun atleta di bodyboard a competi pa dos siman y mei, den e dos diferente competencia organisa pa e asociacion mundial di bodyboard profesional, A.P.B. na e pais di Portugal. E atletanan a competi den diferente categoria manera men's open division, dropknee division y junior division. Pa nos atletanan di bodyboard esaki sigur tabata un oportunidad y experiencia unico mirando cu nan a competi contra di e mihonan di mundo den e deporte extremo aki.

Den e ultimo añanan, e deporte extremo a bira uno hopi popular na unda particularmente nos hobennan ta practica esaki na nos costanan Norte, esakinan Druif, Wariruri, Dos Playa, Anker y na e Bocanan.  Aruba Bodyboard Association ta organisa su competencianan a base regular y ta purba a lo menos di competi un bes pa aña den exterior pa asina nos atletanan gana mas experencia internacional.