logo

ARUBA ta felicita atleta di Mixed Martial Arts, Gregory Milliard cu su titulo di campeon

Den fin di siman tras di lomba tabata un grand dia pa e deporte di Mixed Martial Arts di Aruba ya cu e atleta Gregory Milliard a logra un hazaña unico ganando un titulo mundial na Detroit, Michingan, Merca. Den su combate contra di e fuerte contrincante Shamier Garcia, e atleta Arubano a duna un tremendo presentacion unda na final e hueznan a duna e pugil Arubano e pelea na su fabor den un desicion unanime.

E deporte di combate Mixed Martial Arts a crece na Aruba unda mas y mas hoben ta practica e deporte di combate. Internacionalmente e deporte di MMA a bira un di esnan mas mira na television, unda miyones y miyones di persona ta sintonisa esaki semanalmente.  E atleta Gregory Milliard, Adrick Croes y Evan Nedd ta un di esnan miho na Aruba cu a representa Aruba varios biaha den exterior y cu exito.

E titulo mundial di e atleta Gregory Milliard a bini na un bon momento y nos tin sigur cu esaki lo sigui engrandece e deporte di MMA. Cu e titulo aki Milliard kende awor tin un record di 29 pelea gana lo mester defende su titulo di campeon ohala na Aruba.