logo

Apertura “Weganan Interinsular” y wega di volleyball: International School Curacao vs Colegio San Nicolas Aruba

For di ‘Fundashon Desaroyo Deportivo Kòrsou’ (FDDK) y su Director sr. Thakaidzwa Doran, IBiSA a haya e informacion y confirmacion cu apertura oficial di e ‘Weganan Interinsular’ como tambe e wega di volleyball cu ta sigui ta wordo transmiti en bibo pa Tele Curacao. 

 

E fundacion deportivo di Corsou su meta ta pa promove deporte, den e caso aki deporte escolar y tambe traha pa rebiba e competencia deportivo entre e paisnan den Reino, esta e ‘Weganan di Reino’ (Koninkrijksspelen).

 

Durante e fin di siman aki (10-13 di maart) ta tuma lugar na Corsou e ‘Weganan Interinsular’. E competencia entre e schoolnan cu ta representa nan isla, ta den e disciplina di deporte di basketball y volleyball. E encuentronan di basketball ta riba nivel di Enseñansa Basico, mientras cu e weganan di volleyball ta riba nivel di Enseñansa Avansa. Apesar cu for di diahuebs ta inicia e weganan pa adelanta e schedule di wega, e apertura oficial ta tuma lugar riba diabierna atardi cuminsando cu e transmision for di 5:30 p.m. Tur wega ta tuma lugar riba tereno di e facilidad deportivo Niels Liberia.

 

Hunto cu Aruba, Boneiro y Corsou, e aña aki tambe ta participa schoolnan di St. Maarten. Esaki lo ta pa e fin di siman di competencia na Corsou solamente. Despues di e aña aki ta e intencion pa St. Maarten tambe participa den e competencia di ‘Weganan Interinsular’ na Aruba y Boneiro den tur otro disciplina di deporte.

For di sr. Doran a ricibi e informacion cu representantenan di e organisacion deportivo escolar di Suriname tambe lo ta presente e fin di siman aki y ta sondea posibilidadnan pa participa den futuro.

 

IBiSA ta invita henter Aruba, specialmente mayor, docente, alumno di e schoolnan cu a biaha pa Corsou, pa sintonisa Tele Curacao riba canal 54 di Cable TV, diabierna dia 11 di maart 2016 cuminsando for di 5:30 p.m. pa e ceremonia di apertura di ‘Weganan Interinsular’. Principalmente pa e wega di volleyball cu ta sigui den un transmision ‘En Bibo’ for di facilidad deportivo di Niels Liberia, unda cu nos hobennan campeon di Aruba Colegio San Nicolas ta enfrenta e campeonnan di Corsou cu ta International School Curacao. IBiSA ta garantisa cu esaki ta un tremendo wega di volleyball, yen di accion cu nos por sigui atrabes di pantaya di television.

 

For di Aruba, IBiSA ta manda palabranan di exito na e fundacion deportivo di Corsou pa un tremendo fin di siman. Y ya caba ta keda den expectativa pa e di dos fin di siman di competencia di ‘Weganan Interinsular’ cu ta tuma lugar na Aruba dianan 7-10 di april cu e deporte di Atletismo y Futbol di Sala (Enseñansa Avansa).

Clausura di ‘Weganan Interinsular’ e aña aki ta na Boneiro (14-17 april) cu deporte di volleyball y futbol, tur dos riba nivel di Enseñansa Basico pa mucha muher.